Räppli

Fasnachtsclique Basel

 

HomeGuestbookRäppliFotteliAgändaDivärsesKontaggtLinksIntärns
 

 
 

E glai historisch Reisli in d'Räppli-Vergangeheit

s'Signet vo dr SWG

In d'Annale vo dr Fasnachtsgschicht isch unseri Clique 1976 ygange und zwoor mit der Gründig underem domoolige Name "Schloofwaagegsellschaft" (SWG). Z'verdangge isch dä historisch Momänt de 3 Gründer: Rolf Eisenring (Dambuur), Peter Oneta und Jörg Storrer (beides Pfyffer).

Zum wenig schmaichelhafte Name hänn sich die drei von ere Instruggtere inspiriere lo, wo gsait heb, si wurde pfyffe wie Schloofendi. Vo dere Usssaag hett me sich aber nit erschüttere lo und isch 1977 mit 10 Lütt s'erscht Mol ygstande. Das Schissdräggzyygli mit em verhaissigsvolle Sujet "Isch en Iberraschig" hett denn saagehafti 100 Frangge Subvention usszahlt griegt.

S'Joor druff sinn's denn scho 17 Mitgliider gsi plus e glains Ladärnli.
Nomol e Jöörli spööter hett me's denn mit Vorfasnacht und eigenem Käller wirgligg "welle wüsse".

Im 1980 isch dr Alex Vögtli als Dambuurmajor drzuegstoosse. Nach lange Joore als Major, Vizepreesi und Preesi isch dr Alex zwoor nümm Aggtivfasnächtler aber als Verfasser vom Zeedel immer no sehr aggtiv und als verdiente Ehreobmaa au no absolut mit de Räppli verbunde.

A dr näggschte Fasnacht hett s'Sujet "100 Joor Delifonitis" ghaisse. Noheliigend, ass me d'Ladärne in Form von ere ächte Delifonkabine (!!) mitgschlaift hett. Speziell isch au no gsi, ass dr Mooler d'Helge drzue i dr Kischte (die mit de vergitterete Fänschter) gmoolt hett..... S'wichtigschte Ereignis im 1981 isch aber mit Sicherheit d'Namensänderig vo Schloofwaagegsellschaft in Räppli gsi, wo mit grosser Mehrheit beschlosse worden isch. Uss Koschtegründ hett me "vorläufig" s'bestehende Signet bybhalte.

I de näggschte Joore sinn d'Mitgliiderzahle kontiniuerlig gstyyge und so hett me 1986 s'10-jöörige Jubiläum mit stolze 39 Aggtive könne fyyre. S'hett aber söttigi gäh, wo das noni glängt hett. Dorum hett me 1989 e Fusion mit de Rippezwigger aagsträbt. Die hänn ganz e tolle Cliquekäller gha, wo e paarne Räppli so gfalle hett, ass si grad übergloffe sinn. D'Fusion isch denn irgendwie doch nit z'stand ko...

Dä Diefschlaag hett me aber wie nüt wäggsteggt und nur wenigi Joor spööter, nämmlig 1992, hänn d'Räppli mit 48 Aggtive und 51 Passive fascht scho Stammvereingrössi erreicht, was bis hütt dr absoluti und au nie meh erreichti Mitgliiderhöggststand gsi isch.

Aber wie s'Läbe halt so spiilt, s'ka nit immer nur uffwärts go. Mit schwindende Mitgliiderzahle (1995 no 26 Aggtivi) sinn d'Fusionsabsichte widdr neu entflammt. Nach 5 Joor Irrige und Wirrige i däre Beziehig (Fusionsversiech oddr Ähnligs mit de Basler Mimpfeli, de Ainsame und Grienpfoolstritzzi) denn s'Räppli-Solo-Revival im Joor 2000.

Räppli-Logo syt 2001

Grund zum fyyre denn im  Joor 2001. Nach eme 1/4 Joorhundert uffe und abe, s'25-jöörige Jubiläum! Pünggtlig zue däm wichtige Aalass hett me s'neue Signet präsentiert. Entworfe hett's dr François Lauras, unsere langjöörige (scho syt 1990) Ladärnemooler. Wie sini andere Kunschtwärgg, won'er für d'Räppli kreiert, isch au das super glunge!

 

 

AGGTUELL